http://repo.lib.jfn.ac.lk/ujrr/handle/123456789/140 2026-10-09T16:18:28Z http://repo.lib.jfn.ac.lk/ujrr/handle/123456789/13147 Title: யாழ்ப்பாண நவீன காண்பியக் கலை வெளிப்பாட்டில் மாற்குவின் தேடலும் பரிசோதனை முயற்சிகளும் - கற்பித்தலியல் அடிப்படைகளும் Authors: Pirashanth, P. Abstract: இவ்வாய்வு யாழ்ப்பாண நவீன காண்பியக் கலை வெளிப்பாடானது புதிய தேடல்கள், பரிசோதனைகள் மூலமாக எவ்வாறான மாற்றங்களுக்கு உட்பட்டது என்பதனை நவீன ஓவியத்தின் தந்தை என அழைக்கப்படும் ஓவியர் மாற்குவின் படைப்புக்களின் அடிப்படையில் ஆராய்வதாக அமைகின்றது. மாற்குவின் காண்பிய வெளிப்பாடுகளின் அணுகுமுறைகள் காண்பியக் கலைக்கான கற்பித்தலியலில் உள்வாங்கப்படுகின்றதா? என்பது ஆய்வுப்பிரச்சினையாக உள்ளது. 1980 களில் இலங்கை அரசியல் நிலவரங்கள், சமூக பண்பாட்டு மாற்றங்கள் போன்றவை மாற்கு அவர்களதும், அவரோடு இயங்கிவந்த இளம் கலைஞர்களின் வெளிப்பாடுகளி;ல் கருப்பொருள் ரீதியான புலமை சார்ந்த புதுமையினைக் கண்டறிவதற்கான பரிசீலினை முயற்சிகளாக அமைந்தன. பாரம்பரிய முறைகளை மீறிய நவீனகலை, இலக்கியம், சிந்தனைகளில் புதிய பரிமாணங்களையும் தீவிர மாற்றங்களையும் முன்னெடுக்கும் முற்போக்குப் புத்தாக்க வாத ‘நவ வேட்கை வாதம’; (Avant - Gaedism/ Modenist Radicalism) சார்ந்த மாற்குவின் ஓவியப் படைப்புக்களில் திரிபு, சிதைவு, விகாரம், இயல்பினை மீறிய கனபரிமாணத் தன்மை போன்ற நவீன அழகியல் நியமங்களையும், சிற்ப வெளிப்பாட்டுகளில் திணிவு, வெளி போன்றவற்றுடன் உருவமைப்பு, உள்ளடக்கம், உத்தி நுட்பங்களின் பல்வகைப் பாணிகளின் முயற்சியினை ஆய்வு செய்வதாக அமைகின்றது. வரையறைகளை மீறிய ஒரு கலைஞனது ஊடகம், கருத்து வெளிப்பாட்டுச் சுதந்திரம் என்பவற்றில் புதிய பரிணாம வளர்ச்சியை கண்டடைந்த மாற்குவின் படைப்புகள் சராம்சம், குணவியல்பு பண்புகள் மாறாது கருத்தமைவுக் கேற்ப யதார்த்த வாத மரபினை கேள்விக்குட்படுத்தும், சவால் விடும் பாங்கினை ஆய்வு செய்வதாக அமைகின்றது. செவிப்புலத்திற்குரிய இராகங்களை கட்புலத்திற்குரிய ஓவிய வெளிப்பாட்டின் கனபரிமாணக் கோடுகள் மூலம் புலன் மாற்றீடு செய்யும் பண்பினை ஆய்வு செய்வதாக அமைகின்றது. மேலைத்தேய, கீழைத்தேய நவீன மூலங்களை ஏற்று புதிய பரிசோதனை முயற்சிகளினூ டாக அவரது படைப்புக்களின் தனித்துவமானது சமூக ரீதியில் அங்கீகரிக்கப்பட்டமைக்கான சான்றாதாரங்களை கலை விமர்சகர்கள், கலையாசிரியர்களின் கருத்துக்களின் அடிப் படையில் விபரிப்பதாகவும்,யாழ்ப்பாணத்து சமகால காண்பிய கலைமீது ஏற்படுத்திய தாக்கம் எவ்வாறானதென பல கோணங்களில் கண்டறிவதாகவும் அமைகின்றது. மேலும் பண்பியல் ஆய்வு, ஒப்பியல் ஆய்வு அணுகுமுறைகள் மூலமாக மாற்குவின் படைப்புக்கள் வெளிப்படுத்தும் பண்பினை ஆய்வு செய்வதாக அமைகின்றது. மாற்குவின் நவீன ஓவிய, சிற்ப வெளிப்பாட்டினை எவ்வாறு வாசிப்பது, அவற்றில் கைக்கொள்ளப்பட்ட உத்திநுட்பங்கள், பரிசோதனைகள் (Experiment) போன்றவற்றை ஆய்வு செய்வதன் மூலம் நவீன, சமகால காண்பியக் கலைப் படைப்பாளிகள், காண்பியக் கலையினை பயின்றுவரும் மாணவர்களுக்கான கற்கை நெறிக் கற்பித்தலியல் அடிப்படை அம்சங்களையும் உள்ளடக்கிய தன்மையினையும் காணமுடிகின்றது. தரவு சேகரிப்பு முறைகளாக நூல்கள், இணையதளம், ஒளிப்படங்கள், நேர்காணல் பதிவுகள் போன்றவை அமைகின்றன. 2026-01-01T00:00:00Z http://repo.lib.jfn.ac.lk/ujrr/handle/123456789/13146 Title: கர்நாடக இசைப் பயிற்சியில் கலப்பொட்டுக் கற்றல், கற்பித்தல் அணுகுமுறைகள் Authors: Vishaliny, S. Abstract: பாரம்பரியக் கர்நாடக இசைக் கல்வியானது தொடக்க காலத்தில் குருகுல முறையை மட்டும் அடிப்படையாகக் கொண்டே வளர்க்கப்பட்டது. பிற்காலத்தில் குருகுலமுறை அல்லது நேரடி வகுப்பறைப் பயிற்சியை மட்டுமே முதன்மையாகக் கொணடதாக மாற்றம் பெற்றது. இலத்திரனியல் வசதிகள் அதிகரித்திருக்கும் தற்காலத்தில் பல்வேறு விதமான கற்றல் முறைகளைக் கொண்டதாக இசைக் கல்வியானது மாற்றம் பெற்று வருகின்றது. நவீன தொழில்நுட்ப வளர்ச்சியும் இலத்திரனியல் ஊடகங்களின் அசுர வளர்ச்சியும் பரவலாக இணைக்கப்பட்டுள்ள இன்றைய காலகட்டத்தில், பாரம்பரியமான நேரடிப் பயிற்சி, இணையவழிக் கற்றல் முறைகளைத் திறம்பட ஒன்றிணைத்து வழங்கும் ‘கலப்பொட்டுக் கற்றல், கற்பித்தல் அணுகுமுறைகள்” போன்றவை இசை பயிலும் மாணவர்களின் ஈடுபாட்டையும் ஒட்டுமொத்த கற்றல் திறனையும் எவ்வாறு மேம்படுத்துகின்றது என்பதைத் இக்கட்டுரை ஆராய்கின்றது.கலப்பொட்டுக் கற்றல் கற்பித்தல் அனுகுமுறை என்பது பாரம்பரியமான நேரடி வகுப்பறைப் பயிற்சியுடன் நவீன எண்ணிம அல்லது இணையவழிக் கற்றல் முறைகள் இரண்டையும் ஒன்றிணைத்து வழங்கும் ஒரு நவீன கல்வி முறையாகும். இன்றைய நவீன உலகில் இந்த அணுகுமுறையானது தவிர்க்க முடியாத ஒன்றாகவும் காணப்படுகின்றது. இக்கலப்பொட்டுக் கற்பித்தல் அணுகுமுறையானது பாரம்பரிய இசை முறைகளின் தனித்துவத்தையும் செழுமையையும் குறைக்காமல், மாணவர்களுக்குச் சுயாதீனமான, நெகிழ்வான கற்றல் அனுபவத்தை வழங்குவதுடன், ஆசிரியர், மாணவர் இடையேயான ஆக்கபூர்வமான தொடர்பை மேலும் ஆழமாக வலுப்படுத்துகிறது. மேலும், மாணவர்களின் தனிப்பட்ட இசைத் திறமைகளை வெளிக்கொணர்வதில் இந்த நவீன கலப்பு முறை மிக முக்கிய பங்கு வகிக்கிறது. இந்த ஆய்வானது விளக்க முறை, பகுப்பாய்வு, விவரண ஆய்வு முறைகளை அடிப்படையாகக் கொண்டு முன்னெடுக்கப்படுகின்றது. இதில் கர்நாடக இசை பயிலும் மாணவர்களிடம் சேகரிக்கப்படும் வினாப் பட்டியல், நேரடி வகுப்பறை அவதானிப்பு ஆகியவற்றின் மூலம், பாரம்பரியக் கற்றல் முறைகளுக்கும் கலப்பொட்டுக் கற்றல் முறைகளுக்கும் இடையே உள்ள மாணவர் ஈடுபாடு சார்ந்த வேறுபாடுகள் ஆழமாகப் பகுப்பாய்வு செய்யப்பட்டு, குறிப்பாக இலத்திரனியல் இசைப்பதிவுகள், மென்பொருட் கருவிகள், காணொளிகள், இசை வகுப்புகள், மாணவர்களின் சுருதி சுத்தம், தாள உணர்வு, கற்பனைத்திறன், மனப்பாடத் திறன் ஆகியவற்றில் எந்தளவிலான ஆக்கபூர்வமான தாக்கத்தை ஏற்படுத்துகின்றது என்பதை இக்கட்டுரை விரிவாக ஆராய முற்படுகின்றது. மேலும், நேரலை, நேரடி வகுப்புகளின் சமச்சீரான ஒருங்கிணைப்பு மூலம் மாணவர்கள் தங்களின் இசைப் பயிற்சிகளை எங்கிருந்தும், எப்போதும் எளிதாக அணுகி மீளாய்வு செய்ய ஏதுவாக அமைகிறது. கர்நாடக இசை கற்பித்தலின் பாரம்பரியத் தன்மை குன்றாமல் பாதுகாக்கும் அதே வேளையில், சமகால நவீன கல்வித் தேவைகளுக்கு ஏற்ப கலப்பொட்டுக் கற்றல் மாதிரியை பல்கலைக்கழகங்கள், கல்வி நிறுவனங்களில் எவ்வாறு வெற்றிகரமாக ஒருங்கிணைக்கலாம் என்பதற்கான பரிந்துரைகளையும் இவ்வாய்வு முன்வைக்க முயலும். 2026-01-01T00:00:00Z http://repo.lib.jfn.ac.lk/ujrr/handle/123456789/13145 Title: ஓவியம், வரைகலை மற்றும் அச்சுப்பதிப்புக்கலை மாணவர்களிடையே நச்சுத்தன்மை கொண்ட கலை உருவாக்கப் பொருட்களும், மூலப்பொருட்களும் குறித்த விழிப்புணர்வும் பாதுகாப்பு நடைமுறைகளும்: சேர் பொன்னம்பலம் இராமநாதன் காண்பிய ஆற்றுகைக் கலைகள் பீட ஓவிய, சிற்பத்துறையில் ஓர் ஆய்வு Authors: Boopalan, L. Abstract: ஓவியம், வரைகலை, அச்சுப்பதிப்பு பயிற்சியின்போது எண்ணெய் வர்ணங்கள், இரசாயன கரைப்பான்கள், மை, வரைதல் ஊடகங்கள், இரசாயன திரவங்கள், தெளிப்பு பிக்சேட்டிவ்கள் (Spray Fixatives) போன்ற கலை மூலப்பொருட்கள் பயன்படுத்தப்படுகின்றன. இவை நீண்டகால சுவாசக் கோளாறுகள், தோல் பாதிப்புகள் மற்றும் கண் எரிச்சல் உள்ளிட்ட உடல்நல அபாயங்களை ஏற்படுத்தும் தன்மை கொண்டவை என அறியப்பட்ட உண்மையாக இருந்தும், ஓவிய, வரைகலை மற்றும் அச்சுப்பதிப்பு கல்வியில் இத்தகைய நச்சுத்தன்மை கொண்ட பொருட்களைப் பயன்படுத்தும் மாணவர்களிடையே அவற்றின் உடல்நல அபாயங்கள் குறித்த விழிப்புணர்வும் நடைமுறைகளும் எந்த அளவிற்குப் பின்பற்றப்படுகின்றன என்பது தொடர்பான ஆய்வுகள் இலங்கை பல்கலைக்கழக சூழலில் மிகக் குறைவாகவே காணப்படுகின்றன. இக்குறையை நிவர்த்தி செய்யும் நோக்கில் இந்த ஆய்வு மேற்கொள்ளப்படுகிறது. இதன் முதன்மை நோக்கங்களாக ஓவிய, வரைகலை, அச்சுப்பதிப்புக்கலை மாணவர்களிடையே நச்சுப் பொருட்கள் தொடர்பான அறிவு எந்த அளவில் உள்ளது என்பதை மதிப்பிடுதல், கலைக்கூட சூழலில் அவர்கள் உண்மையாகப் பின்பற்றும் பாதுகாப்பு நடவடிக்கைகளை (முகக்கவசம், கையுறை, காற்றோட்டம் போன்றவை) கண்டறிதல், மற்றும் அறிவுக்கும் நடைமுறைக்கும் இடையே காணப்படும் இடைவெளியை ஆராய்தல் ஆகியவை கொள்ளப்படுகின்றன. இத்துடன், மாணவர்கள் அதிகமாகப் பயன்படுத்தும் நச்சுத்தன்மை கொண்ட பொருட்களை அடையாளம் காணுதல், இரசாயன பொருட்களின் சேமிப்பு மற்றும் கழிவகற்றல் நடைமுறைகளைப் பரிசீலித்தல் ஆகியனவும் இவ்வாய்வின் துணை நோக்கங்களாக அமைகின்றன. இதற்காக, யாழ்ப்பாணப் பல்கலைக்கழக, சேர் பொன்னம்பலம் இராமநாதன் காண்யிப ஆற்றுகைக்கலைகள் பீடத்தில் ஓவிய, சிற்பத்துறையில் இளங்கலை பயிலும் மாணவர்களில் எழுமாற்றகாத் தெரிவுசெய்யப்பட்ட மாணவர்களிடையே கட்டமைக்கப்பட்ட கேள்வித்தாளின் மூலம் தரவுகள் சேகரிக்கப்பட்டன. விளக்க முறை அளவு ஆய்வு முறையில் பெறப்பட்ட தரவுகள் விளக்கப் புள்ளிவிபரங்கள், கருதுபொருள் அடிப்படையிலான பகுப்பாய்வு மூலம் ஆய்வுக்கு உட்படுத்தப்பட்டன. ஆய்வின் கண்டுபிடிப்பின் சாரமாக, தற்போதைய பாடத்திட்டத்தில் நச்சுப்பொருட்கள், பாதுகாப்பு நடைமுறைகள் முறையாகக் குறிப்பிடப்படாமையும் மாணவர்களின் செய்முறை வழக்கங்களில் உள்ள கவனயீனமும் அறியப்பட்டன. இவ்வாய்வு ஓவியம், வரைகலை மற்றும் அச்சுப்பதிப்பு கல்வியில் உடல்நலப் பாதுகாப்பு தொடர்பான தற்போதைய நிலையை வெளிப்படுத்துவதோடு மட்டும் நின்றுவிடாது, பாதுகாப்பு விழிப்புணர்வை மேம்படுத்துவதற்கான கல்வி, நிறுவனம் சார்ந்த பரிந்துரைகளையும் முன்வைக்கின்றது. 2026-01-01T00:00:00Z http://repo.lib.jfn.ac.lk/ujrr/handle/123456789/13144 Title: இசை கற்றலில் குருகுலம், நிறுவனமய கற்பித்தலின் முக்கியத்துவம் ஒப்பீட்டு ஆய்வு Authors: Sulakkana Nirupama, B.V.T. Abstract: இசை என்பது வெறும் கலை வெளிப்பாடாக மட்டுமல்லாது, ஒரு சமூகத்தின் பண்பாடு, மரபு, வரலாறு ஆகிய ஆன்மீக உணர்வுகளை வெளிப்படுத்தும் ஆற்றல் மிக்க ஊடகமாகவும் விளங்குகின்றது. மனிதனின் உணர்வுகளை வெளிப்படுத்தவும், பல தலைமுறைகளுக்குப் பண்பாட்டு விழுமியங்களைப் பரிமாறவும் இசை முக்கிய பங்கு வகிக்கிறது. இசையினைக் கற்றல், கற்பித்தல் முறைகள் காலத்தின் மாற்றங்களுக்கேற்ப பல்வேறு பரிணாம வளர்ச்சிகளை அடைந்துள்ளன. பண்டைய காலங்களில் இசைக் கல்வி பெரும்பாலும் குருகுலம் மூலம் வழங்கப்பட்டது. இம்முறையில் குருவின் நேரடி வழிகாட்டல், தொடர்ச்சியான பயிற்சி, வாய்மொழி மரபு, தனிநபர் மையக் கற்றல் ஆகியவை முக்கிய அம்சங்களாக அமைந்தன. மாணவர் இசையறிவுடன் ஒழுக்கம், பணிவு, கலையுணர்வு போன்றனவற்றையும் குருவின் மூலம் பெற்றார். காலப்போக்கில் கல்வி நிறுவனங்களின் வளர்ச்சியுடன் இசைக் கற்பித்தலானது நிறுவனமய முறைக்கு மாற்றமடைந்தது. பாடத்திட்ட அடிப்படையிலான கற்றல், மதிப்பீட்டு முறை, சான்றிதழ் வழங்கல், நவீன தொழில்நுட்பப் பயன்பாடு ஆகியவை நிறுவனமய இசைக் கல்வியின் சிறப்பம்சங்களாக விளங்குகின்றன. இந்நிலையில், பாரம்பரிய குருகுல முறையின் ஆழமான பயிற்சி அணுகுமுறைகளையும், நிறுவனமயக் கல்வியின் முறையான அறிவியல் அணுகுமுறைகளையும் ஒப்பிட்டு ஆராய்வது, நவீன இசைக் கல்வியின் மேம்பாட்டிற்கு இன்றியமையாததாக அமைகின்றது. இவ் ஆய்வானது, இசை கற்றலில் குருகுலமுறைக் கற்பித்தலின் முக்கியத்துவத்தை விளக்குவதோடு குருகுலக் கற்பித்தல் முறையினையும் நிறுவனமயக் கற்பித்தல் முறையினையும் ஒப்பீட்டு ரீதியில் ஆராயும் ஆய்வாக மேற்கொள்ளப்படுகிறது. இவ் ஆய்வின் ஆய்வுப்பிரச்சனையானது, குரு-சிஸ்ய பாரம்பரியத்தை அடிப்படையாகக் கொண்ட குருகுல முறையின் தனித்துவமான கற்றல் அனுபவங்கள் நவீன நிறுவனமயக் கல்வி முறையில் எந்த அளவிற்கு பிரதிபலிக்கின்றன என்பதையும், இரு கல்வி முறைகளினதும் பலம், வரம்பு ஆகியவற்றை ஒப்பீட்டு ரீதியில் ஆராய்வதையும் மையமாகக் கொண்டுள்ளது. குறிப்பாக இசை அறிவுப் பரிமாற்றம், தனிநபர் மையக் கற்றல், பயிற்சியின் ஆழம், ஒழுக்கம், மேடை அனுபவம், தொழில்நுட்பப் பயன்பாடு போன்ற அம்சங்கள் ஆராயப்படுகின்றன. குருகுலமுறைக் கற்பித்தலின் சிறப்பம்சங்களை ஆராய்தல், நிறுவனமயக் கற்பித்தல் முறையின் இயல்புகளை விளக்குதல்,, எதிர்கால இசைக் கல்விக்கான பொருத்தமான அணுகுமுறைகளை முன்வைத்தல் ஆகியன இவ் ஆய்வின் நோக்கங்களாகும். ஆய்வு முறையியலாக தரவியல் ஆய்வு, வரலாற்று ஆய்வு, ஒப்பீட்டு ஆய்வு, நூலாய்வு, ஆவணப் பகுப்பாய்வு முறைகள் பயன்படுத்தப்படுகின்றன. இதற்காக நூல்கள், ஆய்வுக்கட்டுரைகள், இசைக் கல்வி தொடர்பான ஆவணங்கள், அறிஞர்களின் கருத்துக்கள் போன்ற இரண்டாம் நிலைத் தரவுகள் பகுப்பாய்வு செய்யப்படுகின்றன. ஆய்வின் கண்டறிதல்களாக, குருகுல முறையின் நிலையான மதிப்புகள், நிறுவனமயக் கல்வியின் சமூகப்பங்களிப்பு ஆகியன கண்டறியப்பட்டதோடு, இரு முறைகளையும் இணைத்தல் எதிர்கால இசைக் கல்விக்கு சிறந்த அணுகுமுறையாகும் என்பது ஆய்வின் முடிவாக முன்வைக்கப்படுகின்றது. 2026-01-01T00:00:00Z